Di tayo talo ‘pre!

May kaibigan ako. Mabait siya. Dalawang taon mahigit na rin kaming magkakilala. Naging magkasama sa bahay ng dalawang buwan. Mas naging malapit kami kaysa sa isang babaeng kasama namin sa bahay. Siguro dahil wala siyang kiyeme. May kayabangan at bossy pero hindi naman ako napipikon sa kanya. Siguro din mas malapit ako sa kanya dahil pinagtatanggol niya ako nung mga panahon na parang nagagalit ang isa naming kabahay dahil ako lang daw ang hindi nagluluto. Ayaw niya din naman daw masayang ang pagkaing lulutuin ko kasi nung mga panahon na iyon kahit pagbubukas ng kalan at pagsaing sa rice cooker hindi ako marunong. Kaya siya na lang daw ang sasalo sa skedyul ko ng pagluluto. Kahit na sa ngayon ay nasa Pinas siya, nakaka-chat ko pa rin siya. Nasabi ko bang tibo siya, tomboy, o babaeng lalaki? Wala akong pintas sa mga taong bading o tomboy. Alam ko hindi nila kasalanan ang magkaroon ng ganung puso. Mas gusto ko ngang kaibigan ang babaeng lalaki kasi hindi sila nakikipagkumpetensya. Handa pang ipaglaban ka pag may nang-away sa iyo. Gusto ko ding kaibigan ang mga lalaking babae ang puso. Malalandi kasi kaya masayang kasama. Kahit na maraming problema gumagaan ang buhay. Wala din akong negatibong kumento sa mga magkakarelasyong parehong babae o parehong lalaki. Malalaki na sila alam nila ang ginagawa nila. At uulitin ko, hindi nila pwedeng turuan ang puso nila kung sino ang itinitibok nito. Hindi nila kasalanan ang magkaroon ng ganung puso.

Ka-chat ko siya kahapon. Mga ilang araw ko na ring napupuna. Mejo weird siya lately. Kung noon astig siya makipag-usap sa akin at mahilig mang-utos na tawagan si ganito, si ganyan. Wala namang kaso sa akin yun kasi sanay na kami sa kaastigan niya. At ni hindi mag-aaksaya ng load yun tawagan ako dito mula Pinas. Lately nag-iba ang ihip ng hangin. Parang nagpapaka-cute pati sa pakikipag-chat. Nawala ang pagka-astig. Nagpapadala pa ng mga sweet poems. At nag-aksayang magtext at mag-long distance call. Natuklasan ko din na numero niya pala ang ilang buwan na ding nagpapamiscol sa akin. Isa pa may ipapadala daw siyang video na ginawa niya para sa akin, All this time ng Part Invention daw ang music background ng video. Bagay na bagay daw sa mga manliligaw ko. Kay E niya daw ipapadala, ang ex-gf niya dito na hanggang ngayon daw ay habol ng habol pa rin sa kanya. Feeling macho ang loko.

Madalas tanong siya ng tanong kung sino na ang bf ko. Hindi ako nagkukuwento. Mas madalas hindi ako nagkukuwento tungkol sa lovelife. Pero dahil ilang araw na ring may nararamdaman na akong kakaibang ipinapahiwatig niya, sinabi ko at kinuwentuhan ko siya. Kilala niya kasi yung bf ko pero di niya pa alam na kami na. Nung oras na iyun niya lang nalaman. Kumontra siya at kung ano-ano pang mga nakaka-offend na salita ang sinabi niya sa akin. Di naman ako nagalit, masakit lang pero syempre madami akong pagtatanggol na sinabi. Im sure naguguluhan kayo pero hayaan nyo na lang magulo ang utak ninyo sa kakaisip kung bakit kailangan ko pang ipagtanggol si boylet. Pero uunahan ko na kayo, wala namang sabit si boylet at wala ding extra baggage. Hindi lang matanggap siguro kung bakit si boylet ang napili ko. Hindi niya daw gusto si boylet para sa akin.

Pero aken lang di rin kau in d end.
Yan ang isa pa sa mga salitang sinabi niya na nakasakit ng puso ko. Sensitive pa naman akong tao. Minsan dinadaan ko sa tawa pero iba talaga kirot kapag ang nasasabihan ng hindi maganda ay yung taong mahal mo.

Pano mo naman nasabi? Tanong ko sa kanya. Ang sagot niya… wala lang. Siguro kung may maganda siyang dahilan na masasabi matatanggap ko pa pero ang sagot na wala lang? Kapag ang relasyon nagtagal ng dalawang taon at nagbabalak na kayong magpakasal, hindi na ba sasabihin ng ibang tao na napakabilis naman ng pangyayari? Pinagsabihan niya ako ng pag-isipan ko daw mabuti.

Tumagal kasi wala ka sa comfort zone u, ur in a different world ryt now weak ang emotions especially malau ka sa pamilya mo. Yan naman ang narinig kong sagot ng sinabi ko kung gaano na kami katagal. Cyempre ibang lugar yan kelangan mo in a way siya to survive the demands ng UAE emotionally. Hindi ko siya maintindihan. Madami naman akong nakilala. Mga babae at lalaking naging kaibigan. Mga lalaking sumubok na ibigay sa akin ang demands na sinasabi niya to survive in UAE emotionally. Hindi pa ba enough yang mga taong yan para maging emotionally strong ako. Inaamin ko at alam niya yun na nung una hindi ko gusto si boylet, pero nung nakilala ko siya ng lubusan naniwala ako totoo palang pwede kang madebelop sa isang tao kahit na sa una hindi mo siya gusto. Hindi ko rin alam kung kelan mo masasabi na ang isang tao ay para lang makatulong na malampasan mo ang emotional weakness mo sa ibang lugar o siya ay mahal mo talaga. Mukhang kinalimutan niyang ipaliwanag sa akin kung papano mo malalalaman yun.

Mahal mo ba talaga yun? Paikot-ikot lang kami sa ganitong tanong. Swerte naman niya sau. Sagot ko malas nga si boylet sa akin kasi sa akin pa siya nainlab, sa isang babaeng maarte, laging nang-aaway at childish (pero sweet naman lolz). Kasi nasanay kana andyan sya kaya ganun. Pinagpipilitan niya pa rin sa akin sabihing hindi ko mahal si boylet kundi kailangan ko lang siya dahil naging kumportable akong lagi siya nasa paligid ko lang. Sinabi ko namang may isa akong taga-hanga na lagi ring nandyan lang sa tabi-tabi, naghihintay, nagmamahal pa rin at pinuntahan pa ang nanay ko nung nagbakasyon siya sa Pinas pero bakit di ko naisip na pwede ko siyang mahalin? Baka di pa dumadating yung 1 great love mo… Pagdadasal ko na makita u talaga kung anu gs2 mo. Nakakapikon pero hindi ko na lang pinapahalata.

Meron daw siyang babaeng gusto ngayon pero ayaw niyang sabihin sa akin. Strange kasi madalas kinukwento niya lahat sa akin. Yung tungkol sa kanila ng ex-girlfriend niya na pinapadalhan niya ng kung anu-anong damit at pagpipilit niyang magkabalikan sila ulit nung nakipagkalas na yung babae. Kinuwento niya at pinakita rin ang litrato nila ng sumunod na naging girlfriend niya sa UAE. Pero ang ayaw niyang sabihin ay kung sino ang babaeng gusto niya ngayon. Saka niya na lang daw sasabihin kapag malapit na akong ikasal. Weird noh.

Buti pala di kita nilgawan nun kung di kawawa ako agad dahil kau na pala.
Gaga di tayo talo! Yan lang ang nasabi ko. Kinabukasan nakailang online at offline siya pero di niya na ako kinakausap.